Komarka Ba Lucia Lobato, La Fo Impaktu Ba PSD

11 Junhu 2012 

Zacarias Albano da Costa

DILI - Prezidenti Partidu Sosial Demokrata (PSD), Zacarias Albano da Costa, hateten, kondenasaun nebee Tribunal Distrital Dili (TDD) fo ba Ministra Lucia Lobato atu tama komarka tinan 5 nee, la fo impaktu ba Partidu PSD.

“Lideransa Partidu PSD Lucia Lobato, Tribunal kondena tinan 5 nee la fo impaktu ba PSD, tama PSD laos ema ida deit, maibe ema barak. Iha PSD nia laran laos ema hotu-hotu santu no diak, maibe prontu nee normal kuandu halo partidu politiku, importante politiku partidu politiku nia nee nafatin,” katak Zacarias ba jornalista sira iha Pantai Kelapa, Dili, Sesta (08/09).

Zacarias lamenta teb-tebes haree partidu barak maka ninia ema tuur iha ministru nebee diskunfia komete kazu oi-oin, maibe sira sempre blokeia. PSD sempre dehan, justisa tenki lao tuir nia dalan.

“Ba ami nia membru, ami la interese see nia lider PSD ka lae. Ami ejiji ba Parlamentu katak kazu Lucia Lobato nian tenki hetan debate iha parlamentu, para hetan suspensaun hodi ba tribunal atu responde, maibe hau hanoin Tribunal halao nia servisu prosesu nee seidauk hotu, sei iha posiblidade hodi halo apelu, mas ami hakarak dehan katak justisa iha TL tenki lao tuir nia dalan e partidu hotu-hotu kuntribui ba justisa lao ba oin,” hateten Zacarias.

Antes nee arguida Lucia Lobato hafoin ramata julgamentu deklara katak, nia prontu simu desizaun husi Tribunal kona ba krime nebe nia halo nune’e nia prontu simu desizaun tama kadeia tinan lima.

“Hau prontu simu kastigu tuir desizaun Tribunal nian, tamba iha nasaun hotu justisa mak boot liu. Hau hanesan sidadaun hakruk ba desizaun nebe Tribunal deside tiha ona katak, hau tama kadeia tinan lima, hau simu desizaun ne’e hodi halo loos justica ba rai ida ne’e,” dehan arguida Lucia Lobato.

Nunee mos Antero da Costa hateten, konaba justisa ema hotu tenki hakruuk, tamba desizaun final. Se arguidu maka sente la satisfeitu entaun bele hasae rekursu ba Tribunal Supremu.

Testamunha Nain Haat Konsege Lori Lucia Lobato Ba Kadeia

Testamunha nain ha,at(4) nebe kompostu husi, Nazario da Silva, Direktor Kompainia Wasupa Lda, Luis Oliveira, familia Lucia Lobato, Maria Curjinha, Joao Curjinha nia deklarasaun iha Tribunal konsege lori arguida Lucia Lobato aktual Ministra da Justica, ba Kadeia tinan 5 ho krime partisipasaun Ekonomi ou negosio.

Iha primeira julgamentu nebe hahu iha fulan marco, Tribunal rona testamunha lubuk ida nebe reprezenta husi Ministeriu Publik,nomos defeza nian, testamunha lubuk ida ne’e mai husi, funsionario Ministeriu Justica, Ministeriu infra estrutura, nomos husi kompainia sira nebe manan tenderizasaun pa fardamentumprizioneiro, rehabilitasaun Notariadu rejistu sivil iha distrito 8, nomos rehabilitasaun ba edefisio prizaun Becora.

MP akuza maka’as arguida Lucia Lobato, actual Ministra da Justica nomos Antonio Freitas xefe aprovizionamentu MJ, nebe deskonfia halo korupsaun, kolusaun nepotismu, maibe iha alegasaun, arguida Lucia Lobato komete krime lubuk ida maibe MP akuza deit Lucia Lobato ho pena unika kadeia tinan 12 inklui Antonio Freitas tinan 9 to’o ikus desijaun final Tribunal, absolve krime balu hatun pena ba Lucia tinan 5 komarka,ho krime partisipasaun ekonomia ou negosiu e arguido Antonio Freitas Absovel total.

Remata akordaun ba arguida Lucia Lobato Zuisa Edite Palmira apela ba arguida karik desizaun Tribunal nian arguida senti la satisfa’as, bele hatama rekursu ba Tribunal Supremu nebe a’as liu.

Iha Tribunal arguida Lucia Lobato ho laran triste deklara katak, nia tama kadeia laos ema seluk, maibe, Luis Oliveira, Maria Curjinha, Joao Curjinha, Nazario da Silva, mak kolia inventa, to ikus Tribunal rona deklarasaun ne’e kondena nia ba kadeia, nia prontu toba iha Gleno ou Becora.

“Hau prontu ba toba iha Becora ou Gleno tuir desizaun Tribunal nian nune’e, ema hotu bele hatene hau halo duni korupsaun, nomos naok osan estadu nian, maibe, la siknifika hau naok duni dala ruma testamunha sira ne’e inventa deit mos Tribunal foti desizaun ida ne’e, hau hakruk ba lei,”dehan Lucia Lobato ho triste iha TDD(8/6).

Hafoin rona tiha desizaun final husi Tribunal primeira isntansia nebe hamonu sentensa tinan 5 ba Lucia Lobato, familia nomos Funsionario MJ balu ho laran triste no tanis, maibe, Lucia mantein nia pozisaun hakarak ba kadeia.

Iha fatin hanesan defeza Sergio Hornai sei la husik kliente maske iha tribunal nia oin arguida lakoi rekursu maibe, defeza nia obrigasaun atu defende kliente ho 15 halo rekursu ba Tribunal Supremu.

Nia haktuir liu tan, tuir lei hatete defeza sei halo hotu buat nebe iha tamba provas nebe sira fo provas nebe mai husi testamunha Luis Oliveira, Maria Curjinha, João Curjinha nomos Nazario da Silva nebe uluk hamutuk iha Kompainia Pualaka maibe ikus mai iha problema, tamba ne’e zuis uja ida ne’e sai hanesan meus de provas ida provado katak, iha tempu neba arguida partisipa iha krime ekonomia ou negosio. Maske Tribunal foti ona desizaun maibe husi parte defeza sei halo rekursu ba Tribunal Supremu.

Juiz nebe prezide akordaun Juiz Koletivo, Edite Palmira (Juiz Prezidente), Jose Maria de Araujo, Paulo Texeira (Juiz Internasional), inklui Ministeriu Publiku Felismino Cardozo. Entertanto Sergio Hornai, Cancio Xavier husi Defeza. Kazu nee rejistu ho numeru de prosesu, 580/2012. alm/nes/lay 

STL