STL, 29 Junhu 2012
DILI - Komisariu Komisaun Anti Korupsaun (KAK), Aderito de Jesus Soares hamutuk ho Sekretaria Estadu Promosaun Igualdade (SEPI), Idelta Maria Rodrigues, fahe informasaun ba funsionariu sira, atu labele monu ba manobra korupsaun, tamba korupsaun nee hamate dezenvolvimentu nasional.
Ba jornalista iha Loja Jacinto Kulu Hun-Dili, Kuarta (27/06), Sekretariu Estadu Promosaun Igualdade (SEPI), Idelta Maria Rodrigues, hateten, korupsaun hanesan dalan nebee hamate dezenvolvimentu nasional, tamba nee, SEPI konvoka reuniaun hamutuk ho funsionario sira hodi bele inkoraja funsionario sira hadook aan husi korupsaun.
“SEPI nia mandatu atu ramata, SEPI rasik tenki kria sistema ruma liu husi reuniaun ida nee atu fo hanoin klean ba funsionario sira nebee permanente, nunee iha futuru sira kontinua servisu nafatin iha governu foun mai, bele hatene kona ba korupsaun,” dehan Idelta.
Idelta hanoin, atu kombate korupsaun presiza kontribuisaun husi ema hotu-hotu laos KAK mesak. Ho ida nee, bainhira too iha mandatu ikus, SEPI konvida mos KAK atu esklarese servisu KAK nian ba funsionariu sira, nunee funsionario sira bele hadook aan husi korupsaun.
Iha fatin hanesan, Komisario Komisaun Anti Korupsaun (KAK), Aderito de Jesus Soares iha nia intervista, hateten, KAK hanesan intituisaun kriminal nebee investiga kriminozu sira, laos lalais investiga fo rezultadu ba publiku, maibe persiza tempu naruk atu halo ida nee.
“Atu halo servisu KAK nian ho diak, KAK foin rekruta tan funsionario nain lima, kona ba investigasaun nian, e hau fiar katak, funsionario sira ne’e sei halao sira nia servisu diak iha futuru, maske agora servisu seidauk lao maximu, maibe iha futuru servisu KAK sei lao diak,” katak Aderito.
Iha fatin seluk, Januario da Costa nudar estudante, hateten, hanesan sidadaun Timor oan senti moe wainhira rai doben TL sai hanesan nasaun korupto iha mundu, nune’e hanesan povu, husu ba KAK tenki hatudu servisu diak, imparsial, no independente hodi investiga ema korupto nebe estraga Timor naran foer iha mundu.
Entertanto Estudante Fakuldade FISIPOL, Maria Fatima kestiona, dalabarak KAK fo sai ba publiku katak, iha membro governu balu involve korupsaun, ho funsionario publiku balun mos halo korupsaun, maibe rezultadu husi deklarasaun nee, povu seidauk hare ho matan, membro governu sira nee ba hatan iha Tribunal.
SEPI Konvoka Reuniaun ho Funsionariu
Sekretario Estadu Promosaun Igualdade (SEPI), Idelta Maria Rodrigues, iha Kuarta (27/06), konvoka reuniaun hamutuk ho funsionario, xefi departementu, xefe aprovizionamentu, hodi rona sira nia opiniaun, esperiensia, no desafiu durante tinan lima (5).
Tuir Idelta, sorumutu nee nudar reflesaun ba tinan 2007-20012 kona ba servisu saida mak SEPI halo tamba durante nee SEPI halo tiha ona reflesaun ida hamutuk ho sosiedade Sivil, Jornalista, Administrador Distrito, no Sub Distrito, ho ministeriu hotu, inklui parseiru sira husi liur kona mandatu SEPI durante tinan lima. Ramata tiha ida ne’e, SEPI kontinua konvoka refleksaun internalmente hamutuk ho funsionariu sira hodi hatene kona ba esperiensia desafiu durante tinan lima nia laran.
“Ami hakerek tiha ona relatorio ba servisu durante tinan lima nian maibe funsionario sira balun la hatene, tamba nee ohin hanesan loron importante atu bele rona ejijensia, defikuldade hotu nebee funsionario sira sente,” Idelta informa.
Idelta haktuir liu tan katak, funsionariu sira nebe servisu permanente, sira sei kontinua halao servisu iha governu foun, presiza hatene saida mak durante ne’e sei sai defikuldade ba instituisaun. nes/mj6
Moprokak
No comments:
Post a Comment