Kombate Korupsaun, Programa Importante Ba Parpol Hotu

DILI - Kombate korupasaun sai hanesan pilar importante ba partidu politiku (parpol) hotu iha eleisaun parlamentar. Partidu Sosial Demokrata (PSD) mos hanoin atu kompate korupsaun, hanesan mos Fretilin ho CNRT.  

“Hau hanoin PSD desde inisiu kedas harii too agora nia programa importante ida mak kombate korupsaun,” dehan Deputada PSD, Maria Paixão ba STL iha Uma Fukun Parlamentu Nasional (PN), Dili, Segunda (14/05).

Nia dehan, PSD la admiti korupsaun iha nia partidu rasik. Se karik aban bainrua ba governu mos la admiti ba nia membru ida halo korupsaun. “Agora mos iha ami nia partidu politiku nia programa nebee ami halo hela mak hanesan revizaun hodi prepara atu ba kampanha no prepara mos karik iha tinan ida nee PSD la sae ba governu, iha periodu ida mai nee ka periodu balun mai, ami bele tuur iha governu, ida nee ami sei tau matan liu ba iha korupsaun nee makaas liu tan,” dehan Maria Paixão.

Tuir Maria Paixao, fundador PSD Sr. Mario Carrascalão nee ema ida nebee tau iha nia importansia desde kleur kedas nia kontra korupasun, tanba nee partidu PSD kontinua kombate korpsaun ida nee iha area hotu. PSD buka para atu kombate korupsaun, maibe ida nee depende ba instrumentu, mekanismu no sistema baziku.

Entretantu Josefa Pereira nudar reprezentante husi Partidu Fretilin, hateten, iha programa nebee aprovadu liu husi kongresista sira iha kongresu nasional katak, Fretilin rejeita makaas korupsaun. “Atu kombate korupsaun nee dalan ida mak tenki reforsa institusaun KAK diak liu tan, para nia bele uza nia kompetensia hodi halo investigasaun ba aktus nebee mak ita haree katak iha evidensia ba iha korupasaun, needuni lei kombate korupsaun nee tenki iha,” hateten Josefa.

Nunee mos Brigida Correira husi Partidu CNRT dehan, programa CNRT nian sira seidauk bele fo sai. Sira so bele fo sai bainhira iha tenpu kampanha maibe sira sei hatutan inisiativa ida atu hamenus no hamate korupsaun. lia

STL, 15 Maiu 2012