DILI - Arguido Antonio Freitas nudar Diretor Aprovizionamentu Ministeriu Justica (MJ), rejeita akuzasaun nebee aprezenta husi Ministeriu Publiku (MP) kona ba kazu Lucia Lobato nian, nebee balun loos no balun la loos.
Tribunal Distrital Dili (TDD), iha Kuarta (09/05), halao kontinuasaun julgamentu ba arguido Antonio Araujo Freitas, tamba deskonfia halo korupsaun no abuzu de poder ba konkursu projeto rehabilitasaun ba Guarda Prizional Becora Dili, iha tinan 2008, maibe arguido rasik konsidera akuzasaun husi MP, balun los no balun la loos.
“Hau nunka falsifika dokumentus inklui asinatura sira nee, tamba antes hau nia kolega de jure sira atu asina dokumentus, sira lee uluk kriteria foin mak asina,” dehan arguido ba Tribunal, hodi hatan perguntas husi juiz kona ba asinatura no falsifikasaun dokumentus sira nee loos ka lae.
Nia mos esklarese liu tan katak, iha momentu nebaa laos nia mak kontakto ho emprezarios sira hodi konkore ba konkursu nee, maibe emprezarios sira hare dereitamente avizu nebee taka iha kuadru avizu Ministeriu Justica nian. Kompainia nebe manan konkursu no kaer projeto nee, laos Xefe Aprovizionamentu mak deside, maibe Superior Ministra Justica, Lucia Maria Brandâo Freitas Lobato mak deside iha konkursu nebee kompainia tolu, kompostu husi Kompainia Zoro Construction Lda, no kompania rua seluk, Tribunal la temi.
Finalidade husi konkursu nee, Kompainia Zorro Construction Lda mak manan hodi kaer obra nee, ho total orsamentu U$ 70.870 mill husi total orsamnetu kada konstrusaun ba uma, ida hetan U$ 17.340 mill.
Iha tribunal, testamunha Elia Vong nudar nain ba Kompania Zoro Construction deklara katak, iha momentu nebaa nia la hatene, iha Ministeriu da Justica iha projeitu kona ba rehabilitasaun uma Guarda Prizional, maibe nia simu telefone ho numeru kantor iha dadersan hodi hatete ba nia atu hatama dokumentus hodi tuir konkursu.
“Hau rona informasaun nee hau konsege ba sosa duni dokumentus ho ho valor U$ 10.00,” dehan testamunha nee ba tribunal.
Julgamentu nee halao husi Juis Koletivo, nebee kompostu husi Duarte Tilman (Juiz Prezidente) Antonio Gomes (Juiz Internasional), João Ribeiro, Angelina Saldanha ho Felismino Cardozo husi (MP). Kazu nee rejistu ho numeru de prosesu, 58/C.ord/2011/TDD. Tuir orariu, kazu nee sei julga fali iha Tersa (29/05), tuku 14:30, hodi rona tan deklarasaun husi testamunha seluk. nes
STL, 11 Maiu 2012
No comments:
Post a Comment