Aderito Lamenta Politikus Garganta Korrupsaun

Posting Husi: Administrator
Kategoria: Notisias Online

Tersa, 22 Junhu 2010 - 13:24:35 OTL

DILI - Komisariu Komisaun Anti Korrupsaun (KAK) Adérito de Jesus lamenta tebes ho lider politikus balun nebe hakilar hodi kritika makas konaba kazu korrupsaun maibe la bazeia faktus konkreitus.

Adérito husu atu lider sira wainhira atu koalia korrupsaun labele lansa deit informasaun falsu, maibe tenki fo informasaun nebe kontribui kombate korupsaun iha TL.

Maske nune’e, Komisariu Adérito dehan, KAK nakloke nafatin atu simu kritika no sujestoens hotu husi parte politikus no ONG, no povu tomak, maibe tenki hato kritika ho konstruktivu.

“Hau respeita tebes kritika ne’ebe mak mosu, maibe hau labele hateten katak hau aseita hotu kritika sira ne’e, respeitu nafatin maibe balun ita la aseita tanba ita bele konversa nafatin para hadia ita nia rain livre husi korrupsaun,” dehan Adérito ba jornalista hafoin halao diskusaun ho Komisaun Anti Korupsaun husi Nasaun Internasional sira husi ASIA liu husi video telekonfress iha Salaun Konferensia Banku Mundial, Lesidere-Dili foin lalais ne’e.

Nia dehan, iha ema balun mos hato kritika ba KAK katak lei seidauk iha maibe hakarak halo ona investigasaun. Ba kestaun ne’e Adérito konsidera importante KAK tenki prepara an forti didiak foin hahu investigasaun ba kazu korrupsaun sira.

“Hau hanoin se lei KAK nian fo poder barak hanesan Singapura nian, maibe ita nia ekipa la forte, entaun deskulpa de’it hau la fiar tebes ba metodolojia ida ne’e. Tanba, hau hanoin ita tenki prepara a’an metin uluk lai foin book korrupsaun,” tenik nia.

Tuir nia katak, koalia konaba kazu korrupsaun nudar interese estadu no povu tomak. Ne’e husu ba sidadaun hotu inklui polikus tomak atu fo apoiu.

Atu investiga KKN, tuir Aderito katak, KAK tenki iha rekursu matenek liu ema korruptor sira, atu nune’e wainhira halo investigasaun ba korrupsaun bele hetan lalais faktus no evidensia.

“Ekipa investigador (KAK) sira tenki matenek sentidu bele halo investigasaun ne’ebe klean ba kazu ida. Sira mos tenki iha meius finanseiru, metodu no kapasidade atu hasoru dezafius,” nia hatete.

Adérito dehan tan, hafoin KAK hamarik to agora ONG, igreija sira no sosiedade balun komesa fo kontribuisaun ba KAK nia servisu.

“Ami kontaktu ona ho NGO Forum hodi fasilita ida de’it ho ONG sira hanesan, LABEH, Luta Hamutuk, Lao Hamutuk no seluk tan,” nia hatete.

Hatan konaba kazu korrupsaun rua nebe Vise Primeiru Ministru Eng. Mario Carrascalão hatama ona ba KAK, tuir Komisariu Adérito katak, nia parte simu ona no sei halao investigasaun. Ego

Fonte: STL
http://suara-timor-lorosae.com
http://suara-timor-lorosae.com/berita-103-ad%C3%9Arito-lamenta-politikus-garganta-korrupsaun.html