Dili (CJITL Flash, 11/3) Relasiona ho informasaun husi gabineti Komisariu Komisaun- KAK konaba atu fo tomada de pose ba adjuntu nain rua ne’ebe hili tiha ona iha Tersa oin mai, deputadu iha Parlementu Nasional – PN la hatene informasaun konaba bainhira mak seremonia ne’e hala’o no se mak atu sai adjuntu ba KAK.
Bankada Fretilin, Estanislau da Silva hateten katak, nia parte seidauk hatene kona ba informasaun ne’e. Estanislau kasu lia hirak ne’e ba CJITL iha Uma Fukun Parlamentu Nasional, (10/03). “Hau seidauk hatene konaba informasaun ne’ebe dehan atu fo tomada de pose ba adjuntu Komisariu KAK nian no hau mos lahatene lolos adjuntu KAK ne’e se” tenik Estanislau.
Iha fatin hanesan Deputadu hosi bankada KOTA, Manuel Tilman mos hateten katak, kona informasaun ne’e nia mos sei dauk hatene klaru. “Hau atu dehan deit katak, atu sai adjuntu ba Komisariu KAK ne’e tenke hili ema ne’ebe mak iha matenek no iha kapasidade diak no hau fiar katak Komisariu Aderitu sei hili ninia adjuntu ida ne’ebe diak” Tilman hateten. Manuel Tilman mos hatutan katak nia parte mos lahatene konaba Komisariu ninia adjuntu rua (2) ne’e se los no bain hira mak atu fo tomada da pose ba ninia drjuntu sira ne’e.
Governu Timor Leste ne'ebe lidera husi Primeiru Ministru, Xanana Gusmao rasik fo ona kompetensia tomak ba Aderito de Jesus atu nomeia adjuntu nain 2 ne'ebe tuir nia iha kapasidade intelektual atu bele kolabora ho nia hodi kombate korupsaun iha Timor Leste.
Foin lalais ne’e, Centru Jornalista Investigativu Timor Leste (CJITL) deskobre informasaun husi gabineti KAK katak tuir planu atu kompleta estrutura iha Gabineti Komisaun Anti Korupsaun - KAK ne’ebe establese iha fulan kotuk, Tersa feira semana oin sei fo posse ba Adjuntu nain rua hodi nune’e bele hala’o ona servisu investigasaun, maske naran rua husi adjuntu ne'e sai segredu extraordinariu ba Aderito de Jesus.
Tuir fontes konfirmadu husi Gabineti KAK iha Farol-Dili ne’ebe lakohi fo esplikasaun klaru konaba naran kandidatu adjuntu nain rua ne’e tanba sei sai hanesan segredu ba gabineti ne’ebe refere. “Ami labele fo sai naran” dehan fontes ne’e. “Kuandu fo sai ne’e to’o iha loron tomada de posse, rai deit nomor telefone pois mak ami dere iha Tersa semana oin para bele ba halo kobertura”.
Komisariu Aderito de Jesus rasik hetan ona tomada de posse fulan kotuk iha Parlamentu Nasional tanba hetan votus husi kandidatu nain rua sira seluk hanesan eis Adjuntu Perkurador Jeral Republika, Ivo Valenti no Provedor Direitus Humanus no Justisa, Sebastião Dias Ximenes.
Iha seremonia tomada de posse ne’e, komisariu eleitu promete atu bolu fila fali kandidatu nain rua ne’ebe kompete ho nia atu servisu hamutuk hodi kombate korupsaun iha Timor Leste.
Aderito mos fiar katak sei iha posibilidade ba KAK hodi kehe sai abut Korupsaun Kolusaun no Nepotizmu (KKN) maske iha dezafius oi-oin. Tanba ne’e nia husu ba instituisaun estadu, sosiadade sivil hodi kopera hamutuk atu nune’e bele kombate korupsaun iha nasaun foun ida ne’e.
Prezidenti Republika Jose Ramos Horta mos fo nia apoiu tomak ba lideransa KAK katak iha duni kapasidade atu kombate korupsaun. Foin lalais ne’e mos Komisariu KAK hasoru malu ona Prokuradora Jeral Republika, Ana Pessoa hodi asina paktu konaba servisu hamutuk atu halo investigasaun ba kazu korupsaun ne’ebe iha.
Husi Organizasaun Non Governamental Lalenok Ba Ema Hotu (LABEH), liu husi Direitur Ezekuitvu, Christopher Henry Samson promete sei fo ezame ba KAK hodi hatama kazu indikasaun korupsaun husi ministeriu tolu hanesan Ministeriu Edukasaun, Ministeriu Justisa no Sekertariu Estadu Siguransa liu-liu iha Departementu Imigrasaun nian. (Thomas/CJITL)
No comments:
Post a Comment